കൊല്ലം: ഇടതുപക്ഷ സര്ക്കാര് ശ്രീനാരായണീയ സമൂഹത്തിന്റെ കണ്ണില് കുത്തിയെന്ന വിമര്ശനവുമായി എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശന്. അധസ്ഥിത വിഭാഗങ്ങളെ അധികാര ശ്രേണിയില് നിന്നും ആട്ടിയകറ്റുന്ന പതിവ് ഈ സര്ക്കാര് ആവര്ത്തിച്ചു. ഈഴവ സമുദായത്തെ സര്ക്കാര് ചതിച്ചു എന്നും വെള്ളാപ്പള്ളി ആരോപിച്ചു. എസ്എന് ട്രസ്റ്റ് സെക്രട്ടറിയായി ചുമതലയേല്ക്കാന് കൊല്ലത്ത് എത്തിയതായിരുന്നു വെള്ളാപ്പള്ളി.
തലസ്ഥാനത്ത് ഗുരുദേവ പ്രതിമ അനാച്ഛാദനം ചെയ്ത ചടങ്ങില് സമുദായ നേതൃത്വത്തിന് പ്രാധാന്യം നല്കാത്തതിനെയും വെള്ളാപ്പള്ളി വിമര്ശിച്ചു.ശ്രീനാരായണ ഗുരുദേവന്റെ പേരില് സ്ഥാപിക്കപ്പെട്ട ഓപ്പണ് സര്വകലാശാല ഉദ്ഘാടനം സര്ക്കാര് രാഷ്ട്രീയ മാമാങ്കമാക്കി. ഉദ്ഘാടന ചടങ്ങില് ഒരു എസ്എന്ഡിപി ഭാരവാഹിയെ പോലും ക്ഷണിച്ചില്ല. സര്വകലാശാല വൈസ് ചാന്സിലര് സ്ഥാനത്തേക്ക് ശ്രീ നാരായണീയരെ പരിഗണിച്ചില്ല. മലബാറില് പ്രവര്ത്തിക്കുന്ന പ്രവാസിയെ നിര്ബന്ധിച്ചു കൊണ്ടു വന്നു വിസിയാക്കാന് മന്ത്രി കെ ടി ജലീല് വാശി കാണിച്ചു. ഉന്നത വിദ്യാദ്യാസ മന്ത്രിയുടെ ചേതോവികാരം മനസിലാക്കാന് പാഴൂര് പടിപ്പുരയില് പോകേണ്ടതില്ലെന്നും വെള്ളാപ്പള്ളി പറഞ്ഞു.
പിന്നാക്ക-അധഃസ്ഥിത വിഭാഗങ്ങളെ അധികാര ശ്രേണിയില് നിന്ന് ആട്ടിയകറ്റുന്ന പതിവ് സര്ക്കാര് ആവര്ത്തിച്ചത് അങ്ങേയറ്റം അപലപനീയമാണെന്നും വെള്ളാപ്പള്ളി കൂട്ടിച്ചേര്ത്തു.
Discussion about this post