മസ്കത്ത്: ഒമാനിലെ സലാലയില് പ്രവാസി മലയാളി വെടിയേറ്റ് മരിച്ച നിലയില്. കോഴിക്കോട് പേരാമ്പ്ര ചെറുവണ്ണൂര് സ്വദേശി നിട്ടംതറമ്മല് മൊയ്തീന് (56) ആണ് മരിച്ചത്. സലാലയിലെ സാദായിലുള്ള ഖദീജ പള്ളിയില് വെച്ച് രാവിലെ പത്ത് മണിയോടെയായിരുന്നു സംഭവം. മൃതദേഹത്തിന് സമീപത്ത് നിന്ന് ഒരു തോക്കും കണ്ടെത്തിയിട്ടുണ്ട്. ആരാണ് വെടിവെച്ചതെന്ന് വ്യക്തമല്ല.
സംഭവത്തെ തുടര്ന്ന് ഈ പള്ളിയില് നമസ്കാരം നിര്ത്തിവെച്ചിട്ടുണ്ട്. ഇന്ന് രാവിലെ പത്തിനും പതിനൊന്നിനും ഇടയ്ക്ക് പള്ളിയില് എത്തിയതായിരുന്നു മൊയ്തീന്. അല്പ സമയത്തിന് ശേഷം ഇവിടെ എത്തിയ മറ്റൊരാളാണ് മൊയ്തീനെ മരിച്ച നിലയില് കണ്ടെത്തിയത്. സംഭവുമായി ബന്ധപെട്ടു കൂടുതല് വിവരങ്ങളൊന്നും പൊലീസ് പുറത്തുവിട്ടിട്ടില്ല.
ഒരു സ്വകാര്യ സ്ഥാപനത്തിലെ ജീവനക്കാരനായിരുന്നു മൊയ്തീന്. കഴിഞ്ഞ മുപ്പതു വര്ഷമായി സലാലയില് ജോലി ചെയ്യുന്നു. ഭാര്യ: ആയിശ. മക്കള്: നാസര്, ബുഷ്റ, അഫ്സത്ത്. മരുമക്കള്: സലാം കക്കറമുക്ക്, ഷംസുദ്ദീന് കക്കറമുക്ക്.
Discussion about this post