കോഴിക്കോട്: മുഖ്യമന്ത്രിയുടെ പോലീസ് ഉപദേശകന് രമണ് ശ്രീവാസ്തവ മന്ത്രിമാരേക്കാള് ശക്തനായി മാറിയെന്ന് കോണ്ഗ്രസ് എംപി കെ മുരളീധരന്. ശ്രീവാസ്തവയെ വിശ്വസിച്ചവര്ക്കെല്ലാം പണികിട്ടിയിട്ടുണ്ടെന്നും മുരളീധരന് പരിഹസിച്ചു. കെഎസ്എഫ്ഇയിലെ വിജിലന്സ് റെയ്ഡിന് പിന്നില് രമണ് ശ്രീവാസ്തവക്ക് പങ്കുണ്ടെന്ന ആരോപണത്തോട് പ്രതികരിക്കുകയായിരുന്നു കെ.മുരളീധരന്.
മുന് മുഖ്യമന്ത്രി കെ കരുണാകരന് ഉള്പ്പെടെ ശ്രീവാസ്തവയെ വിശ്വസിച്ചവര്ക്കൊക്കെ പണികിട്ടിയിട്ടുണ്ട്. കരുണാകരന്റെ പടിയിറക്കത്തില് പങ്കുവഹിച്ച വ്യക്തിയാണ് ശ്രീവാസ്തവ. രാജ്യദ്രോഹിയെന്ന് വിളിച്ചവര് തന്നെ ഇപ്പോള് ശ്രീവാസ്തവയെ തലയിലേറ്റി നടക്കുകയാണെന്നും മുരളീധരന് പറഞ്ഞു.
വര്ഷങ്ങള്ക്ക് മുമ്പ് കരുണാകരന് ഭരിക്കുന്ന സമയത്ത്, പിണറായി വിജയന് നിയമസഭയില് എംഎല്എയായി ഉണ്ടായിരുന്ന സമയത്താണ് ‘ചാരമുഖ്യന് രാജിവെക്കുക’, ‘ശ്രീവാസ്തവയെ അറസ്റ്റ് ചെയ്യുക’യെന്ന മുദ്രാവാക്യം ഉയന്നത്. ആ ശ്രീവാസ്തവ ഇപ്പോള് പിണറായിയുടെ ഏറ്റവും വലിയ വിശ്വസ്തനായി. ശിവശങ്കറുണ്ടാക്കിയ പരിക്കിനൊപ്പം ശ്രീവാസ്തവ കൂടിയായാല് പിണറായിക്കത് തിരിച്ചടിയാകുമെന്നും മുരളീധരന് കൂട്ടിച്ചേര്ത്തു.
Discussion about this post