ന്യൂഡല്ഹി: യുദ്ധത്തെ തുടര്ന്ന് പഠനം പൂര്ത്തിയാക്കാനാകാതെ യുക്രെയ്നില് നിന്ന് മടങ്ങിയെത്തിയവര്ക്ക് മെഡിക്കല് സീറ്റ് നല്കിയ ബംഗാള് സര്ക്കാര് നടപടി കേന്ദ്രസര്ക്കാര് തടഞ്ഞു. നിലവിലെ ചട്ടപ്രകാരം ഇത് അനുവദിക്കാനാകില്ലെന്ന് ചൂണ്ടിക്കാട്ടിയാണ് നടപടി.
വിദേശത്ത് പഠനം നടത്തുന്നവര്ക്ക് ഇന്ത്യയില് തുടര് പഠനം അനുവദിക്കാനാകില്ലെന്നും മെഡിക്കല് കൗണ്സില് ചട്ടം ഇതനുവദിക്കുന്നില്ലെന്ന നിലപാടിലാണ് കേന്ദ്ര സര്ക്കാര്. ദേശീയ മെഡിക്കല് കമ്മീഷന്റെ ചട്ടപ്രകാരം വിദേശത്ത് നിന്ന് പഠനം പൂര്ത്തിയാക്കിയവര്ക്ക് 12 മാസം പ്രാക്ടീസോ ഇന്റേണ്ഷിപ്പോ ചെയ്തിരിക്കണം. അതിന് ശേഷം ഫോറിന് മെഡിക്കല് ഗ്രാജുവേഷന് പരീക്ഷ എഴുതിയാണ് ഇന്ത്യയില് ഇന്ത്യയില് പ്രാക്ടീസ് ചെയ്യാന് അനുവാദം നല്കുക. അല്ലാതെ കോഴ്സ് പകുതിക്കു വെച്ച് മുടങ്ങിയവര്ക്ക് ഇന്ത്യയില് തുടര്പഠനം നടത്താനായി ചട്ടം അനുവദിക്കുന്നില്ല.
റഷ്യ- യുക്രൈന് യുദ്ധ സാഹചര്യത്തില് മലയാളികളടക്കമുള്ള ആയിരക്കണക്കിന് വിദ്യാര്ത്ഥികളാണ് ഇന്ത്യയിലേക്ക് മടങ്ങിയതെത്തിയത്. ഇവരില് ഭൂരിപക്ഷവും മെഡിക്കല്- ദന്തല് വിദ്യാര്ത്ഥികളാണ്.
യുക്രെയ്നില്നിന്ന് ബംഗാളിലേക്കു മടങ്ങിയെത്തിയ 412 വിദ്യാര്ഥികള്ക്കു വേണ്ടിയാണു തുടര്പഠനവുമായി ബന്ധപ്പെട്ട നിര്ണായക തീരുമാനം ബംഗാള് സര്ക്കാരെടുത്തത്. 172 വിദ്യാര്ഥികള്ക്കു രണ്ടാം വര്ഷവും മൂന്നാം വര്ഷവും പഠനം നടത്താനുള്ള അവസരമൊരുക്കാനായിരുന്നു നീക്കം. 132 വിദ്യാര്ഥികള്ക്കു പ്രാക്ടിക്കല് ചെയ്യുന്നതിനുള്ള സൗകര്യവുമൊരുക്കി. ഇതോടെയാണ് ദേശീയ മെഡിക്കല് കമ്മിഷനും കേന്ദ്ര ആരോഗ്യ മന്ത്രാലയവും വിഷയത്തില് ഇടപെട്ടത്.
തങ്ങളുടെ തുടര്പഠനത്തിനായി സര്ക്കാര് ഇടപെടല് വേണമെന്ന് രക്ഷിതാക്കളും തിരിച്ചെത്തിയ വിദ്യാര്ത്ഥികളും ആവശ്യപ്പെട്ടിരുന്നു. രാജ്യത്തെവിടെയും പഠിക്കാന് തയ്യാറാണെന്നും തുടര് പഠനത്തിന് നിയമ ഭേദഗതിയുള്പ്പെടെയുള്ളവ പരിഗണിക്കണമെന്നുമാണ് രക്ഷിതാക്കളുടെയും വിദ്യാര്ത്ഥികളുടെയും ആവശ്യം. ലക്ഷങ്ങള് വായ്പയെടുത്താണ് വിദ്യാര്ത്ഥികളില് ഭൂരിഭാഗം പേരും മെഡിക്കല് പഠനത്തിനായി പോയത്. അസാധാരണ സാഹചര്യമായതിനാല് നാട്ടില് തിരിച്ചെത്തി. യുദ്ധഭൂമിയിലേക്ക് ഇനി മടങ്ങാന് സാഹചര്യമില്ലെന്നും രാജ്യത്തെ കോളേജുകളില് പഠിക്കാന് അവസരം നല്കണമെന്നുമാണ് വിദ്യാര്ഥികളുടെ ആവശ്യം. ഇതിനിടെയാണ് വിദ്യാര്ത്ഥികര്ക്ക് മെഡിക്കല് കോളേജുകളില് പഠനം അനുവദിച്ച പശ്ചിമ ബംഗാളിന്റെ നീക്കം കേന്ദ്രം തടഞ്ഞത്.
അതേ സമയം, റഷ്യ യുക്രെയ്ന് യുദ്ധസാഹചര്യത്തില് ഇന്ത്യയിലേക്ക് മടങ്ങിയ എംബിബിഎസ് ഇന്റേണ്ഷിപ്പ് വിദ്യാര്ത്ഥികള്ക്ക് 12 മാസത്തെ നിര്ബന്ധിത ഇന്റേണ്ഷിപ്പ് ഇന്ത്യയില് പൂര്ത്തിയാക്കാന് അനുമതി നല്കുമെന്ന് നാഷണല് മെഡിക്കല് കമ്മീഷന് നേരത്തെ അറിയിച്ചിരുന്നു. 2021 നവംബര് 18-ന് മുമ്പ് വിദേശത്ത് നിന്നും മെഡിക്കല് ബിരുദം നേടിയവര്ക്കാകും അവസരം ലഭിക്കുക. എഫ് എം ജി പരീക്ഷ പാസായാല് ഇതിനുള്ള അനുമതി നല്കും.
Discussion about this post