തിരുവനന്തപുരം: സംസ്ഥാനത്ത് കോവിഡ് മൂലം മാതാപിതാക്കളെ നഷ്ടപ്പെട്ട കുട്ടികള്ക്ക് ധനസഹായം അനുവദിച്ച് വനിത ശിശുവികസന വകുപ്പ് ഉത്തരവ് പുറപ്പെടുവിച്ചതായി ആരോഗ്യമന്ത്രി വീണാ ജോര്ജ് അറിയിച്ചു. സംസ്ഥാനത്ത് കോവിഡ് ബാധിച്ച് മാതാപിതാക്കള് മരണപ്പെട്ട കുട്ടികള്ക്കും അതോടൊപ്പം നേരത്തെ മാതാപിതാക്കളില് ഒരാള് മരണപ്പെടുകയും ശേഷിച്ച ആള് ഇപ്പോള് കോവിഡ് മൂലം മരണപ്പെട്ട് രക്ഷിതാക്കള് പൂര്ണമായും നഷ്ടപ്പെട്ടതുമായ എല്ലാ കുട്ടികള്ക്കുമാണ് സഹായം അനുവദിക്കുന്നത്.
2,000 രൂപ വീതം വനിതാശിശു വികസന വകുപ്പിന്റെ ഫണ്ടില് നിന്നും കുട്ടിക്ക് 18 വയസ് ആകുന്നതുവരെ കുട്ടിയുടെയും കുട്ടിയുടെ ഇപ്പോഴത്തെ രക്ഷിതാവിന്റെയും പേരിലുള്ള ജോയിന്റ് അക്കൗണ്ടിലേയ്ക്ക് മാസം തോറും നിക്ഷേപിക്കുന്നതാണ്. ഈ കുട്ടികളുടെ പേരില് മൂന്ന് ലക്ഷം രൂപയുടെ സ്ഥിര നിക്ഷേപവും തുടങ്ങും.
കൂടാതെ ഈ കുട്ടികളുടെ ബിരുദതലം വരെയുള്ള പഠനച്ചെലവുകള് മുഖ്യമന്ത്രിയുടെ ദുരിതാശ്വാസനിധിയില് നിന്നും വഹിക്കുന്നതാണ്. ഈ ധനസഹായങ്ങള്ക്ക് ആവശ്യമായി വരുന്ന അധികതുക ധനവകുപ്പാണ് അനുവദിക്കേണ്ടതെന്നും മന്ത്രി വ്യക്തമാക്കി.
Discussion about this post