പാലക്കാട്: പട്ടാമ്പി പാലത്തില്‍ നിന്നും ഭാരതപ്പുഴയിലേക്ക് ചാടി മരിച്ച കൊപ്പം ആമയൂര്‍ സ്വദേശി രേഷ്മയുടെ മരണത്തില്‍ ദുരൂഹത. രേഷ്മ ആത്മഹത്യ ചെയ്യാനുണ്ടായ കാരണം തേടുകയാണ് പൊലീസ്.
ഇന്നലെ രാത്രി ഒന്‍പത് മണിയോടെയാണ് സംഭവം. പാലത്തിനരികില്‍ ചെരിപ്പും ഷാളും ബാഗും ഉപേക്ഷിക്കപ്പെട്ട നിലയില്‍ കണ്ട ആളുകളാണ് പൊലീസിനെ വിവരം അറിയിച്ചത്. തുടര്‍ന്ന് പൊലീസെത്തി ഇന്നലെ രാത്രി മുതല്‍ തിരച്ചില്‍ നടത്തുകയായിരുന്നു. എന്നാല്‍ വെളിച്ചക്കുറവ് മൂലം രാത്രി തിരച്ചില്‍ നിര്‍ത്തി. ഇന്ന് രാവിലെയാണ് മൃതദേഹം കണ്ടെത്തിയത്.
ഫോണ്‍ സംഭവസ്ഥലത്ത് നിന്ന് ലഭിച്ചെങ്കിലും ലോക്കായിരുന്നതിനാല്‍ ആളെ ആദ്യം തിരിച്ചറിയാനായിരുന്നില്ല. തുടര്‍ന്ന് ആളെ കണ്ടെത്താനായി പ്രദേശത്തെ ആളെ കാണാനില്ലെന്ന പരാതികള്‍ ഏതൊക്കെയെന്ന് പൊലീസ് സംഘം അന്വേഷിച്ചു. ഈ സമയത്താണ് കൊപ്പം പൊലീസ് സ്റ്റേഷനില്‍ രേഷ്മയുടെ അമ്മ നല്‍കിയ പരാതി ശ്രദ്ധയില്‍ പെട്ടത്. രാത്രി 7.50 നാണ് പരാതി ലഭിച്ചത്. രേഷ്മ ഒന്‍പത് മണിയോടെയാണ് പുഴയിലേക്ക് ചാടിയത്.
ഭര്‍ത്താവ് അജീഷുമായി രേഷ്മ കുറച്ചുനാളായി അകന്നു കഴിയുകയായിരുന്നു എന്നാണ് വിവരം. പത്തുവയസ്സുള്ള മകളുണ്ട്. ബന്ധുക്കളുടെ വിശദമായ മൊഴിയെടുത്ത ശേഷം സംഭവത്തില്‍ വ്യക്തത വരുത്തനാണ് പൊലീസിന്റെ ശ്രമം. രേഷ്മയുടെ മൊബൈല്‍ പൊലീസ് വിശദ പരിശോധനയ്ക്ക് അയയ്ക്കും. പോസ്റ്റുമോര്‍ട്ടം നടപടികള്‍ക്ക് ശേഷം മൃതദേഹം ബന്ധുക്കള്‍ക്ക് വിട്ടുനല്‍കി.
Discussion about this post