അഹിന്ദു ആയതിനാല് കൂടല് മാണിക്യം ഉത്സവത്തിനോട് അനുബന്ധിച്ചുള്ള നൃത്തോല്സവത്തില് അവസരം നിഷേധിച്ചുവെന്ന ആരോപണവുമായി നര്ത്തകി മന്സിയ. ഏപ്രില് 21 വ്യാഴാഴ്ച ആറാം ഉത്സവം പ്രമാണിച്ചുള്ള കലാപരിപാടികളുടെ ഭാഗമായി ഭരതനാട്യം അവതരിപ്പിക്കാന് നോട്ടീസിലടക്കം പേര് അച്ചടിച്ചതിന് ശേഷമാണ് ക്ഷേത്ര ഭാരവാഹികളില് ഒരാള് ഇക്കാര്യം അറിയിച്ചതെന്നാണ് മന്സിയ ഫേസ്ബുക്ക് കുറിപ്പില് വിശദമാക്കുന്നത്.
മന്സിയയുടെ ഫേസ്ബുക്ക് കുറിപ്പിന്റെ പൂര്ണരൂപം:
കൂടല്മാണിക്യം ഉത്സവത്തോടനുബന്ധിച്ചുള്ള ‘നൃത്തോല്സവത്തില്’
ഏപ്രില് 21 വൈകീട്ട് 4 to 5 വരെ ചാര്ട്ട് ചെയ്ത എന്റെ പരിപാടി നടത്താന് സാധിക്കില്ല എന്ന വിവരം പറഞ്ഞുകൊണ്ട് ക്ഷേത്രഭാരവാഹികളില് ഒരാള് എന്നെ വിളിച്ചു. അഹിന്ദു ആയതു കാരണം അവിടെ കളിക്കാന് സാധിക്കില്ലത്രേ.
നല്ല നര്ത്തകി ആണോ എന്നല്ല മതത്തിന്റെ അടിസ്ഥാനത്തില് ആണ് എല്ലാ വേദികളും. വിവാഹം കഴിഞ്ഞതോടെ ഹിന്ദു മതത്തിലേക്ക് convert ആയോ എന്നൊരു ചോദ്യവും വന്നു കേട്ടോ. ഒരു മതവുമില്ലാത്ത ഞാന് എങ്ങോട്ട് convert ആവാന്.. ഇത് പുതിയ അനുഭവം ഒന്നുമല്ല.
വര്ഷങ്ങള്ക്ക് മുന്പ് ഗുരുവായൂര് ഉത്സവത്തിനോടനുബന്ധിച്ച് എനിക്ക് തന്ന അവസരവും ഇതേ കാരണത്താല് ക്യാന്സല് ആയി പോയിരുന്നു. കലകളും കലാകാരരും മതവും ജാതിയുമായി കെട്ടിമറഞ്ഞു കൊണ്ടേയിരിക്കും. അതൊരു മതത്തിനു നിഷിദ്ധമാകുമ്പോള് മറ്റൊരു മതത്തിന്റെ കുത്തക ആവുന്നു.
#മതേതര കേരളം ??
Nb: ഇതിലും വലിയ മാറ്റിനിര്ത്തല് അനുഭവിച്ചു വന്നതാണ്. ഇതെന്നെ സംബന്ധിച്ച് ഒന്നുമല്ല. ഇവിടെ കുറിക്കുന്നത് കാലം ഇനിയും മാറിയില്ല എന്നു മാത്രമല്ല വീണ്ടും വീണ്ടും കുഴിയിലേക്കാണ് പോക്കെന്ന് സ്വയം ഓര്ക്കാന് വേണ്ടി മാത്രം..
മലപ്പുറം ജില്ലയിലെ വള്ളുവമ്പ്രത്തു നിന്നുള്ള മന്സിയ ക്ഷേത്ര കലകള് പഠിച്ചതിന്റെ പേരില് ഏറെ വിവേചനം നേരിട്ട് മുസ്ലിം പെണ്കുട്ടിയാണ്. മതവാദികള് ഒറ്റപ്പെടുത്തിയപ്പോള് രക്ഷിതാക്കളുടെ പിന്തുണയിലാണ് മന്സിയ പിടിച്ചുനിന്നത്. അമ്മ ക്യാന്സര് ബാധിച്ച് മരിച്ച ശേഷം കബറടക്കം അടക്കമുള്ള ചടങ്ങുകള്ക്ക് വിലക്കുകള് മന്സിയയുടെ കുടുംബം നേരിട്ടിരുന്നു. മദ്രാസ് സര്വകലാശാലയില് നിന്ന് എം എ ഭരതനാട്യത്തിന് ഒന്നാം റാങ്കോടെയാണ് മന്സിയ പാസായത്.
Discussion about this post