തിരുവനന്തപുരം: സംസ്ഥാനത്തെ പോളിടെക്നിക് കോളേജുകളിലേക്ക് ലാറ്ററല്‍ എന്‍ട്രി വഴി രണ്ടാംവര്‍ഷ ഡിപ്ലോമ പ്രവേശനത്തിന് അപേക്ഷ ക്ഷണിച്ചു. പ്ലസ് ടു/വി.എച്ച്.എസ്.ഇ/ കെ.ജി.സി.ഇ പാസായവര്‍ക്ക് അപേക്ഷിക്കാം.
ഫിസിക്സ്, കെമിസ്ട്രി, മാത്തമാറ്റിക്സ്, ഇംഗ്ലീഷ് എന്നിവ വിഷയങ്ങളായി പഠിച്ച് പ്ലസ് ടു പാസ്സായവര്‍ക്ക് ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങളില്‍ ഒരുമിച്ചു 50 ശതമാനം മാര്‍ക്ക് ലഭിച്ചിട്ടുണ്ടെങ്കില്‍ അപേക്ഷിക്കാം. ഈ വിഷയങ്ങള്‍ പഠിച്ച വി.എച്ച്.എസ്.ഇകാര്‍ക്കും പ്ലസ്ടുവിന് തുല്യതയുണ്ടെങ്കില്‍ അപേക്ഷിക്കാം.
എ.ഐ.സി.റ്റി.ഇ മാനദണ്ഡ പ്രകാരം ഈ വര്‍ഷം മുതല്‍ രണ്ടുവര്‍ഷ ഐ.റ്റി.ഐ/കെ.ജി.സി.ഇ കോഴ്സുകള്‍ പാസായവര്‍ക്ക് തങ്ങളുടെ നൈപുണ്യ സര്‍ട്ടിഫിക്കറ്റുമായി ബന്ധപ്പെട്ട ഡിപ്ലോമ പ്രോഗ്രാമിലേക്ക് ലാറ്ററല്‍ എന്‍ട്രി വഴി നേരിട്ട് രണ്ടാം വര്‍ഷത്തിലേക്ക് പ്രവേശനം ലഭിക്കും. ഇവര്‍ക്ക് ഒന്നാം വര്‍ഷ ഡിപ്ലോമ പ്രവേശനത്തിന് നീക്കി വച്ച മുഴുവന്‍ സീറ്റുകളും ഈ വര്‍ഷം മുതല്‍ ലാറ്ററല്‍ എന്‍ട്രി വഴി രണ്ടാം വര്‍ഷത്തിലേക്ക് നേരിട്ട് പൂര്‍ത്തിയാക്കാം.
കഴിഞ്ഞ വര്‍ഷംവരെ ഐ.റ്റി.ഐ/കെ.ജി.സി.ഇ കോഴ്സുകള്‍ പഠിച്ചവര്‍ക്ക് മൂന്ന് വര്‍ഷം കൊണ്ട് ഡിപ്ലോമ സര്‍ട്ടിഫിക്കറ്റ് ലഭിച്ചിരുന്നു. പോളിടെക്നിക് കോളേജുകളില്‍ പഠിച്ചുകൊണ്ടിരിക്കുന്നവര്‍ക്കോ മുന്‍പ് പഠിച്ചവര്‍ക്കോ അപേക്ഷിക്കാനാവില്ല. ലാറ്ററല്‍ എന്‍ട്രി വഴി പ്രവേശനം നേടുന്നവര്‍ പ്രോസ്പെക്ടസില്‍ പ്രതിപാദിച്ചിട്ടുള്ള ഒന്നാംവര്‍ഷത്തിന്റെ ക്രെഡിറ്റ് ലഭ്യമാക്കുന്നതിനായി നിശ്ചയിച്ചിട്ടുള്ള അധിക വിഷയങ്ങള്‍ നിശ്ചിത സമയത്തിനകം പാസ്സാകണം. മാര്‍ക്കിന്റെ അടസ്ഥാനത്തിലാണ് റാങ്കുകള്‍ തയ്യാറാക്കുന്നത്. റാങ്കുകളുടെ അടിസ്ഥാനത്തില്‍ സ്പോട്ട് അഡ്മിഷന്‍ വഴിയായിരിക്കും പ്രവേശനം. അര്‍ഹതയുള്ളവര്‍ക്ക് ജാതി സംവരണവും ലഭിക്കും. 22ന് റാങ്ക് ലിസ്റ്റ് പ്രസിദ്ധീകരിക്കും. റാങ്ക് ലിസ്റ്റിന്റെ അടിസ്ഥാനത്തില്‍ 27നുള്ളില്‍ പ്രവേശനം നടത്തും. കോവിഡ്-19 ന്റെ പശ്ചാത്തലത്തില്‍ സര്‍ക്കാര്‍ മാനദണ്ഡങ്ങള്‍ പാലിച്ചാണ് പ്രവേശനം നടത്തുക.
300 രൂപയാണ് അപേക്ഷാ ഫീസ് (എസ്.സി/എസ്.ടി വിഭാഗക്കാര്‍ക്ക് 150 രൂപ). അപേക്ഷ www.polyadmission.org/let ല്‍ ഓണ്‍ലൈനായി ഈ മാസം 17വരെ നല്‍കാം. അപേക്ഷയോടൊപ്പം അപേക്ഷാഫീസും ഓണ്‍ലൈനായി അടയ്ക്കണം.
Discussion about this post