കോവിഡ് പ്രതിരോധ പ്രവര്‍ത്തനങ്ങള്‍ ശക്തമാക്കുകയാണ് ശാസ്താംകോട്ട. ഇതിന്റെ ഭാഗമായി 300 കിടക്കകളുള്ള രണ്ടു പ്രാഥമിക ചികിത്സാ കേന്ദ്രങ്ങള്‍ ജൂലൈ 18 ന് ആരംഭിക്കും.
പ്രതിരോധ ചികിത്സാ സംവിധാനങ്ങള്‍ കാര്യക്ഷമമായി നടപ്പിലാക്കുന്നതിന് വേണ്ടി ശാസ്താംകോട്ട ഗ്രാമപഞ്ചായത്തില്‍ ചേര്‍ന്ന വകുപ്പുതല ഉദ്യോഗസ്ഥരുടെയും ജനപ്രതിനിധികളുടെയും യോഗത്തിലാണ് ഈ തീരുമാനം.
ശാസ്താംകോട്ട എം സി എം എം ആശുപത്രിയുടെ എതിര്‍വശത്തുള്ള ലേഡീസ് ഹോസ്റ്റല്‍, മാര്‍ ബസേലിയോസ് കോളേജിനോട് ചേര്‍ന്നുള്ള മെന്‍സ് ഹോസ്റ്റല്‍ എന്നിവിടങ്ങളാണ് പ്രാഥമിക ചികിത്സാ കേന്ദ്രങ്ങളായി മാറുക. ലേഡീസ് ഹോസ്റ്റലില്‍ 200 ഉം മെന്‍സ് ഹോസ്റ്റലില്‍ 100 ബെഡ്ഡുകളുമുള്ള രണ്ടു പ്രാഥമിക ചികിത്സാ കേന്ദ്രങ്ങളാണ് ഒരുക്കുന്നത്.
ജൂലൈ 18 ന് രണ്ട് ചികിത്സാ കേന്ദ്രങ്ങളും തുറന്നു പ്രവര്‍ത്തിക്കും. കൂടാതെ എം സി എം എം ആശുപത്രിയില്‍ ഡോക്ടര്‍മാര്‍ക്കും മറ്റ് സ്റ്റാഫുകള്‍ക്കുമടക്കം താമസിക്കുവാനും പി പി ഇ കിറ്റുകള്‍ അടക്കമുള്ളവ സൂക്ഷിക്കുവാനും 28 മുറികൾ സജ്ജമാക്കിയിട്ടുണ്ട്.
നിലവില്‍ വാളകം മേഴ്‌സി ഹോസ്പിറ്റലില്‍ 100 രോഗികള്‍ക്കുള്ള പ്രാഥമിക ചികിത്സാ കേന്ദ്രം പ്രവര്‍ത്തിക്കുന്നുണ്ട്. നിലവിൽ 58 രോഗികളാണ് അവിടെ ചികിത്സയിലുള്ളത്.
കൂടാതെ നെടുമ്പന സാമൂഹിക ആരോഗ്യ കേന്ദ്രവും(പഴയ ടി ബി ഹോസ്പിറ്റല്‍) പൂര്‍ണ സജ്ജമാണ്. ഏതുസമയത്തും രോഗികള്‍ എത്തുന്ന മുറയ്ക്ക് ചികിത്സിക്കാനുള്ള എല്ലാ സംവിധാനവും ഇവിടെ ഒരുക്കിയിട്ടുണ്ട്.
മീയണ്ണൂര്‍ അസീസിയ മെഡിക്കല്‍ കോളേജ്(നഴ്‌സിംഗ് സ്‌കൂള്‍ ഹോസ്റ്റല്‍), വിളക്കുടി ലിറ്റില്‍ ഫ്ളവര്‍ ഹോസ്പിറ്റല്‍, കൊല്ലം ആശ്രാമം ന്യൂ ഹോക്കി സ്റ്റേഡിയം എന്നിവ ജൂലൈ 17 ന് പ്രവര്‍ത്തനം ആരംഭിക്കും.
ശാസ്താംകോട്ട, പോരുവഴി എന്നിവിടങ്ങള്‍ പ്രത്യേക നിരീക്ഷണ മേഖലകളായി പ്രഖ്യാപിച്ചിരിക്കുന്നതിനാൽ കര്‍ശന നിയന്ത്രണങ്ങളാണ് ഇവിടെ ഏര്‍പ്പെടുത്തിയിരിക്കുന്നത്.
ഈ മേഖലകളില്‍ പൊതുജനങ്ങള്‍ക്ക് ആവശ്യമായ ഭക്ഷ്യധാന്യങ്ങള്‍ എത്തിക്കുന്നതിന് വേണ്ടി ത്രിവേണി മൊബൈല്‍ യൂണിറ്റുകളുടെ പ്രവര്‍ത്തനം തുടങ്ങുവാനും റോഡുകള്‍ അടയ്ക്കുവാനും ഉന്നതതല യോഗത്തിൽ തീരുമാനിച്ചു.
Discussion about this post