കോഴിക്കോട്: നിപയെന്ന മഹാമാരിക്കെതിരായി പോരാടി സിസ്റ്റര്‍ ലിനി വിടവാങ്ങിയിട്ട് ഇന്നേക്ക് രണ്ടു വര്‍ഷം. പേരാമ്പ്ര താലൂക്ക് ആശുപത്രിയില്‍ ജോലി ചെയ്തിരുന്ന ലിനി നിപാ ബാധിതരെ ശുശ്രൂഷിക്കുന്നതിനിടെയാണ് വൈറസ് ബാധയേറ്റ് മരണത്തിന് കീഴടങ്ങിയത്. മരിക്കുന്നതിന് മുമ്പ് ഭര്‍ത്താവിനായി ലിനി എഴുതിയ കത്തിലെ വാചകങ്ങള്‍ ഇന്നും മലയാളികളുടെയെല്ലാം മനസിലെ നൊമ്പരമാണ്. നിപ തന്നില്‍ നിന്ന് മറ്റുള്ളവര്‍ക്ക് പകരാതിരിക്കാനായി ലിനി ശ്രദ്ധിച്ചു. സ്വന്തം ഭര്‍ത്താവിനെയും കുഞ്ഞുങ്ങളെയും അവസാനമായി ഒരു നോക്ക് കാണാന്‍ പോലും കഴിയാതെയാണ് ലിനി വിട വാങ്ങിയതും.
ഭൂമിയിലെ മാലാഖയോടൊപ്പം കുറച്ചകാലം ഒന്നിച്ച് ജീവിക്കാന്‍ പറ്റിയ താന്‍ ഭാഗ്യവാനാണെന്ന് ലിനിയുടെ ഭര്‍ത്താവ് സജീഷ് ഫേസ്ബുക്കില്‍ കുറിച്ചു.
സജീഷിന്റെ ഫെയ്‌സ്ബുക്ക് പോസ്റ്റിന്റെ പൂര്‍ണരൂപം:
ലിനി….
നിന്റെ വേര്‍പാടിന് ഇന്ന് രണ്ട് വയസ്സ്
ലോകം ഇന്ന് മറ്റൊരു വൈറസിനോട് പൊരുതികൊണ്ടിരിക്കുകയാണ്.
നീ പകര്‍ന്ന് നല്‍കിയ കരുതല്‍
നീ കാണിച്ച ആത്മസമര്‍പ്പണം
നീ കാണിച്ച മാതൃക
ഇന്നീ കോവിഡിന്റെ മുന്‍പിലും ഞങ്ങള്‍ക്ക് ധൈര്യം നല്‍കുന്നു.
നീ അവസാനം കുറിച്ചിട്ട വാക്കുകള്‍ ഞങ്ങള്‍ക്കുളള ജീവിതമാണ്. റിതുലും സിദ്ധാര്‍ത്ഥും എല്ലാം തിരിച്ചറിയാന്‍ തുടങ്ങിയിരിക്കുന്നു. രണ്ട് പേരും നിന്റെ ആഗ്രഹം പോലെ ഗള്‍ഫില്‍ പോയി സന്തോഷത്തോടെ തിരിച്ച് വന്നു.
ഒരു കാര്യത്തില്‍ ഞാന്‍ ഭാഗ്യവാന്‍ ആണ്
ഭൂമിയിലെ മാലാഖയോടൊപ്പം കുറച്ചു കാലം ഒന്നിച്ച് ജീവിക്കാന്‍ പറ്റിയതിന്.
മരിക്കുകയില്ല നീ ലിനി….
Discussion about this post