യുവനടിമാരില് ശ്രദ്ധേയയായ സാന്നിധ്യമാണ് ലിയോണ ലിഷോയ്. ‘ഇഷ്ക്’, ആന്മേരിയ കലിപ്പിലാണ്’, ‘മായാനദി’, മറഡോണ’, ‘അതിരന്’ തുടങ്ങി നിരവധി ചിത്രങ്ങളിലൂടെ മലയാളികളുടെ ഇഷ്ടം കവര്ന്ന അഭിനേത്രി. പ്രമുഖ സിനിമാ സീരിയല് താരമായ ലിഷോയിയുടെ മകള് കൂടിയായ ലിയോണയെ ഏറ്റവുമൊടുവില് കണ്ടത് ‘ട്വല്ത്ത് മാന്’ എന്ന ചിത്രത്തിലാണ്.
ഏതാനും വര്ഷങ്ങളായി താന് അഭിമുഖീകരിക്കുന്ന എന്ഡോ മെട്രിയോസിസ് എന്ന രോഗാവസ്ഥയെ കുറിച്ച് ലിയോണ പങ്കുവച്ച ഒരു കുറിപ്പാണ് ഇപ്പോള് ശ്രദ്ധ നേടുന്നത്. ലിയോണയുടെ കുറിപ്പ് ഇങ്ങനെ-
ജീവിതം സുന്ദരമാണ്… ചിലപ്പോള് വേദനാജനകവും. മിക്കപ്പോഴും ഇതു രണ്ടും നിറഞ്ഞതായിരിക്കും. രണ്ടു വര്ഷം മുന്പാണ് എനിക്ക് എന്ഡോമെട്രിയോസിസ് (സ്റ്റേജ് 2) സ്ഥിരീകരിക്കുന്നത്. രണ്ട് വര്ഷം കഠിനമായ വേദനകളുടെ കാലമായിരുന്നു. എന്ഡോമെട്രിയോസിസുമായി ജീവിക്കുന്നത് വളരെ വെല്ലുവിളി നിറഞ്ഞതും ഒരു തുടര്ച്ചയായ പ്രക്രിയയുമാണ്.
എന്നാല് എന്റെ ശാരീരികവും മാനസികവുമായ ആരോഗ്യത്തെക്കുറിച്ച് തീര്ത്തും അവ്യക്തതയില് നിന്ന് എന്റെ ശരീരത്തിലെയും മനസ്സിലെയും മാറ്റങ്ങള് അംഗീകരിക്കുന്ന ഈ ഭയാനകമായ യാത്രയില് നിന്ന്, തീര്ച്ചയായും എന്റെ കുടുംബത്തിന്റെയും അടുത്ത സുഹൃത്തുക്കളുടെയും സഹായത്തോടെ, ഞാന് ഒരുപാട് മുന്നോട്ട് പോയി എന്ന് ഞാന് വിശ്വസിക്കുന്നു. എന്ഡോമെട്രിയോസിസിന്റെ പ്രധാന ലക്ഷണങ്ങളിലൊന്ന് കഠിനമായ ആര്ത്തവ വേദനയാണ്. കഠിനമായ ആര്ത്തവവേദന നല്ലതല്ല. അത് സാധാരണമല്ല. ഇതു വായിക്കുന്ന സ്ത്രീകളോട് ഞാന് അഭ്യര്ഥിക്കുന്നു.. ദയവായി ഡോക്ടറെ കാണുക.
ഗര്ഭാശയത്തിന്റെ ഏറ്റവും ഉള്ളിലുള്ള സ്തരമാണ് എന്ഡോമെട്രിയം.’എന്ഡോമെട്രിയ’ ത്തിലെ കോശങ്ങള് ഗര്ഭപാത്രത്തിന് വെളിയിലായി മറ്റ് ആന്തരിക അവയവങ്ങളില് കാണപ്പെടുന്ന അവസ്ഥയാണ് ‘എന്ഡോമെട്രിയോസിസ്’ എന്നറിയപ്പെടുന്നത്. ലോകത്തെ സ്ത്രീകളില് ഏകദേശം 6 മുതല് 10 ശതമാനം വരെ എന്ഡോമെട്രിയോസിസ് ബാധയുള്ളവരാണ് എന്നാണ് കണക്കാക്കപ്പെട്ടിരിക്കുന്നത്.
ആര്ത്തവ സമയത്ത് വസ്തി പ്രദേശത്ത് അനുഭവപ്പെടുന്ന അമിതമായ വേദന, വന്ധ്യത എന്നിവയാണ് ഈ രോഗത്തിന്റെ സര്വസാധാരണമായ ലക്ഷണങ്ങള്. ഭൂരിഭാഗം സ്ത്രീകളിലും മാസമുറയോടനുബന്ധിച്ചാണ് ഈ വേദന അനുഭവപ്പെടുന്നത്. ചുരുക്കം ചിലരില് സ്ഥിരമായ വേദനയായും അനുഭവപ്പെടാറുണ്ട്.
Discussion about this post