കോഴിക്കോട്: സ്വന്തം വീട്ടില് തന്നെ മോഷണം നടത്തിയ യുവാവ് പിടിയില്. കോഴിക്കോട് പരിയങ്ങാട് തടയില് പുനത്തില് ബാബുവിന്റെ മകന് സിനീഷ് (അപ്പൂസ്) ആണ് പിടിയിലായത്. കഴിഞ്ഞ വെള്ളിയാഴ്ചയായിരുന്നു സംഭവം.
വീട്ടിലാരും ഇല്ലാത്ത സമയത്തായിരുന്നു സിനീഷ് മോഷണം നടത്തിയത്. അച്ഛനും അമ്മയും ജോലിക്ക് പോയതിനു പിന്നാലെ ഭാര്യയെ അവരുടെ വീട്ടിലാക്കി. ശേഷം വീട് കുത്തിത്തുറന്ന് അച്ഛന്റെ അലമാരയില് സൂക്ഷിച്ചിരുന്ന 50,000 രൂപ മോഷ്ടിച്ചു. മോഷണം നടത്തിയത് പുറത്തുനിന്നുള്ള ആളാണെന്ന് വരുത്തി തീര്ക്കാന് തന്റേതിനേക്കാള് വലിയ ഷൂസ് ധരിച്ചാണ് എത്തിയത്.
മുളകുപൊടി വിതറി അതില് ഷൂസിന്റെ അടയാളം വരുത്തിയശേഷം ഷൂസ് വീട്ടുമുറ്റത്ത് ഉപേക്ഷിച്ചു. വിരലടയാളം പതിയാതിരിക്കാന് കയ്യില് പേപ്പര് കവറും ധരിച്ചിരുന്നു. കുറ്റം സമ്മതിച്ച പ്രതി, ഒളിപ്പിച്ചു വച്ച പണവും വീടിന്റെ പൂട്ട് പൊളിക്കാന് ഉപയോഗിച്ച ബ്ലേഡും പൊലീസിന് കാണിച്ചുകൊടുത്തു. റിമാന്ഡ് ചെയ്ത പ്രതിയെ പൊലീസ് മൂന്നുദിവസത്തേയ്ക്ക് ജാമ്യത്തില് വിട്ടു. കടബാധ്യതയുള്ള സിനീഷ് ഇതിന് മുന്പും വീട്ടില് നിന്ന് മോഷണം നടത്തിയിട്ടുണ്ട്. ഇക്കാര്യം വീട്ടുകാര് അറിഞ്ഞില്ലെന്ന് മനസ്സിലാക്കി വീണ്ടും മോഷണം നടത്തുകയായിരുന്നു. മാവൂര് പൊലീസ് നടത്തിയ അന്വേഷണത്തിലാണ് പ്രതി പിടിയിലായത്.
Discussion about this post