ഉത്തരകൊറിയയില് ആദ്യമായി കോവിഡ് സ്ഥിരീകരിച്ചു. പ്യോങ്യാങ് പ്രവിശ്യയില് ഒമിക്രോണ് വ്യാപനം സ്ഥിരീകരിച്ചതിനെത്തുടര്ന്ന് കിം ജോങ് ഉന് രാജ്യവ്യാപകമായ ലോക്ക്ഡൗണ് പ്രഖ്യാപിച്ചു.
രാജ്യത്തിന്റെ ശക്തമായ പ്രതിരോധ സംവിധാനങ്ങള് മറികടന്നുണ്ടായ ആരോഗ്യഅടിയന്തരാവസ്ഥയായി ഈ ആദ്യ കേസിനെ കണക്കാക്കി കൂടുതല് കടുത്ത നിയന്ത്രണങ്ങള് ഏര്പ്പെടുത്തും എന്ന സൂചനയും കൊറിയന് സെന്ട്രല് ന്യൂസ് ഏജന്സി നല്കി.
എന്നാല് ഉത്തരകൊറിയയില് നിരവധി പേര്ക്ക് ഇതിനോടകം തന്നെ കോവിഡ് ബാധ ഉണ്ടെന്നാണ് ആരോഗ്യനിരീക്ഷകരുടെ അഭിപ്രായം. 2020ല് കോവിഡ് വ്യാപനമുണ്ടായപ്പോള് മുതല് ഉത്തരകൊറിയ സ്വീകരിച്ചിട്ടുള്ള ഒരേയൊരു പ്രതിരോധ മാര്ഗം അതിര്ത്തികള് പൂര്ണമായും അടച്ചിടുക എന്നത് മാത്രമാണ്.
അന്താരാഷ്ട്ര ഏജന്സികള് വാക്സിന് നല്കാന് സന്നദ്ധത പ്രകടിപ്പിച്ചിട്ടും ജനങ്ങള്ക്ക് കോവിഡ് വാക്സിന് നല്കാന് കിം ജോങ് ഉന് വിസമ്മതിച്ചിരുന്നു. ഈ സാഹചര്യത്തില്, വളരെ വലിയൊരു കോവിഡ് വ്യാപനത്തിന്റെ ഭീഷണിയിലാണ് കൊറിയയിലെ ജനങ്ങള് എന്ന മുന്നറിയിപ്പാണ് അന്താരാഷ്ട്ര ആരോഗ്യ ഏജന്സികള് നല്കുന്നത്.
Discussion about this post