ആശീർവാദ് സിനിമാസിന്റെ 22-ാം വാർഷികം ആഘോഷിച്ചു. 2000 ജനുവരി 26 ന് ‘നരസിംഹം’ സിനിമ റിലീസ് ചെയ്തുകൊണ്ടാണ് ആശീർവാദ് സിനിമാസ് പ്രവർത്തനം ആരംഭിച്ചത്. മോഹൻലാലിന്റെ സിനിമാ ജീവിതത്തിലെ ഒരു പിടി മികച്ച സിനിമകൾ പ്രേക്ഷകർക്ക് സമ്മാനിച്ചത് ആശീർവാദ് സിനിമാസ് തന്നെയാണ്.22-ാം വർഷവും കമ്പനിയുടെ കൂടെ സഞ്ചരിച്ച ഏവർക്കും നന്ദി പറഞ്ഞു കൊണ്ടാണ് മോഹൻലാൽ രംഗത്തെത്തിയിരിക്കുന്നത്. നരസിംഹം മുതൽ ഇന്നുവരെ പിന്തുണ നൽകിയ എല്ലാ പ്രേക്ഷകരേയും, സിനിമയിൽ സഹകരിച്ച എല്ലാവരേയും ഓർക്കുന്നുവെന്ന് ആന്റണി പെരുമ്പാവൂറും പറഞ്ഞു.
മോഹൻലാൽ സംവിധാനം ചെയ്യുന്ന പുതിയ ചിത്രമാണ് ബറോസ്. ചിത്രത്തിന്റെ ലൊക്കേഷനിലായിരുന്നു ആശിർവാദ് സിനിമാസിന്റെ 22ാം വാർഷികം ആഘോഷിച്ചത്. മോഹൻലാൽ കേക്ക് മുറിക്കാൻ എത്തിയത് ബറോസിലെ താടി നീട്ടിവളർത്തിയ ലുക്കിലായിരുന്നു. ചിത്രത്തിന്റെ സിനിമാറ്റോഗ്രാഫർ സന്തോഷ് ശിവൻ ഉൾപ്പെടെയുള്ള അണിയറപ്രവർത്തകരും ആഘോഷവേളയിൽ പങ്കെടുത്തു.അവസാനമായി ആശിർവാദ് സിനിമാസ് നിർമിച്ച് റിലീസ് ചെയ്ത ചിത്രം പൃഥ്വിരാജ് സംവിധാനം ചെയ്ത ബ്രോ ഡാഡിയാണ്.ആശിർവാദ് സിനിമാസിന്റെ ബാനറിൽ നിർമിക്കുന്ന ബറോസിന്റെ ചിത്രീകരണം പുരോഗമിച്ചുകൊണ്ടിരിക്കുകയാണ്. മൈ ഡിയർ കുട്ടിച്ചാത്തൻ ഒരുക്കിയ ജിജോ നവോദയ ആണ് ബറോസിന്റെ തിരക്കഥാകൃത്തും ക്രിയേറ്റിവ് ഡയറക്ടറും. സന്തോഷ് ശിവൻ ഛായാഗ്രഹണവും സന്തോഷ് രാമൻ പ്രൊഡക്ഷൻ ഡിസൈനും നിർവഹിക്കുന്നു.ഗോവയിലാണ് സിനിമയുടെ പ്രധാന ലൊക്കേഷൻ.
Discussion about this post