പത്തനംതിട്ട: പത്തനംതിട്ട കോന്നിയില്‍ ഭാര്യയെയും മകനെയും വെട്ടി കൊന്ന ശേഷം ഗൃഹനാഥന്‍ ആത്മഹത്യ ചെയ്തു. പയ്യനാമണ്‍ സ്വദേശി സോണി, ഭാര്യ റീന, മകന്‍ റയാന്‍ എന്നിവരാണ് മരിച്ചത്. സാമ്പത്തിക പ്രതിസന്ധിയാണ് കാരണമെന്നാണ് സൂചന. മരിച്ച സോണി വിഷാദരോഗത്തിന് ചികിത്സ തേടിയിരുന്നതായി നാട്ടുകാര്‍ പറഞ്ഞു.
സോണി ഭാര്യയെയും മകനെയും വെട്ടി കൊന്ന ശേഷം വീട്ടില്‍ തൂങ്ങി മരിക്കുകയായിരുന്നു എന്നാണ് കരുതുന്നത്. രണ്ട് ദിവസം മുമ്പ് നടന്ന സംഭവം ഇന്ന് രാവിലെയാണ് അറിയുന്നത്. ഇവരെ ഫോണില്‍ ബന്ധപ്പെടാന്‍ ശ്രമിച്ചിട്ട് കിട്ടാതിരുന്നതിനെ തുടര്‍ന്ന് അടുത്ത ബന്ധു വീട്ടിലെത്തി നോക്കിയപ്പോഴാണ് മൂന്ന് പേരുടേയും മൃതദേഹം കണ്ടത്. വീട് അടച്ചിട്ട നിലയിലായിരുന്നതിനാല്‍ നാട്ടുകാരും സംഭവം അറിഞ്ഞില്ല.
വിദേശത്ത് വ്യവസായി ആയിരുന്നു സോണി രണ്ട് കൊല്ലം മുമ്പാണ് നാട്ടിലെത്തിയത്. വ്യവസായത്തിന് നിക്ഷേപിച്ച പണം കബളിപ്പിക്കപ്പെട്ടതിനെ തുടര്‍ന്ന് സോണി കടുത്ത സാമ്പത്തിക പ്രതിസന്ധിയിലായിരുന്നു. പിന്നീട് വിഷാദരോഗം ബാധിച്ചു. തിരുവല്ലയിലെ സ്വകാര്യ ആശുപത്രിയില്‍ വിഷാദ രോഗത്തിന് ചികിത്സയിലായിരുന്നു.
കുട്ടികള്‍ ഇല്ലാതിരുന്ന ദമ്പതികള്‍ റയാനെ ദത്തെടുത്തതായിരുന്നു.
Discussion about this post